नवोदय शिष्यवृत्तीसह गुणवत्तापूर्ण शिक्षणाचे केंद्र!

 नवोदय शिष्यवृत्तीसह गुणवत्तापूर्ण शिक्षणाचे केंद्र!

- जिल्हा परिषद प्राथमिक शाळा, गिरमेवस्ती

जेऊरकुंभारी ता. कोपरगाव, जिल्हा अहिल्यानगर येथे असलेली जिल्हा परिषद प्राथमिक शाळा - गिरमेवस्ती ही एक वेगळी ओळख असलेली शाळा आहे. बहुतांश खाजगी शाळा केवळ टॉपर विद्यार्थ्यांना प्रवेश देतात, पण गिरमेवस्ती शाळा मात्र प्रत्येक सामान्य, मागास, मध्यम विद्यार्थ्याला संधी देते आणि त्यांना गुणवंत बनवते. यशस्वी विद्यार्थी घडवणे हीच खरी शाळेची कामगिरी आहे, असे येथे ठामपणे मानले जाते.

शाळेच्या यशाचे श्रेय जाते प्रेरणास्थान व मार्गदर्शक  म्हणून उभ्या असणाऱ्या श्रीमती शबाना शेख मॅडम, गटशिक्षणाधिकारी, पंचायत समिती कोपरगाव गिरमेवस्ती शाळेच्या मुख्याध्यापिका प्रियंका जोशी, उपाध्यापक अनुज ढुमणे, उपाध्यापक सुदाम साळुंके आणि संपूर्ण शिक्षक वर्गाला. त्यांच्या मागे  तसेच शाळा व्यवस्थापन समिती आणि पालकांचेही मोठे योगदान आहे.

 शाळेमध्ये नवोदय शिष्यवृत्ती मार्गदर्शन ही एक मोठी ताकद आहे. विद्यार्थ्यांना शिष्यवृत्ती नवोदयसारख्या स्पर्धा परीक्षांमध्ये घडवण्यासाठी विशेष अभ्यासक्रम आणि मार्गदर्शन सत्रे घेतली जातात. शिक्षकांचा अनुभव आणि समर्पण यामुळे  शाळेच्या विद्यार्थ्यांनी मोठे यश मिळवले.

 अनुभवी शिक्षक वर्ग ही शाळेची खरी ताकद आहे. शिक्षक केवळ विषय शिकवणारे नसून, विद्यार्थ्यांचे मार्गदर्शक, मित्र, आणि कधी कधी पालकही होतात. प्रत्येक विद्यार्थ्याला समजून घेऊन, त्यांच्या गरजेनुसार शिकवणे ही येथे रीत आहे.

डिजिटल अध्यापन ही आणखी एक वैशिष्ट्यपूर्ण बाब आहे. गिरमेवस्ती शाळेत डिजिटल पद्धतीने वर्ग घेतले जातात. टॅब, व्हिडिओ क्लिप्स, अॅप्स आणि स्मार्ट टीव्ही चा वापर करून विद्यार्थी कल्पना अधिक स्पष्ट समजून घेतात. ग्रामीण भागातील ही डिजिटल क्रांती पालकांसाठीही कौतुकास्पद ठरते.

नाविन्यपूर्ण उपक्रम राबवणे ही गिरमेवस्ती शाळेची ओळख आहे. वर्षभरात विविध उपक्रम राबवले जातात. यातून विद्यार्थी केवळ शैक्षणिकदृष्ट्या नव्हे, तर व्यक्तिमत्त्व विकासाच्या दृष्टीनेही घडतात.

शाळेमधून शैक्षणिक सहली आयोजित केल्या जातात. या सहलींमध्ये विद्यार्थी निसर्ग, ऐतिहासिक स्थळे, धार्मिक,  विज्ञान केंद्रे, कृषी केंद्रे यांना भेट देतात. त्यांच्या अनुभवातील जग व्यापक होण्यासाठी हे प्रयत्न केले जातात.

विविध स्पर्धांमध्ये सहभाग घेण्यावर शाळेचा भर असतो. निबंध लेखन, चित्रकला, वक्तृत्व, विज्ञान प्रदर्शन, खेळ, लोककला अशा अनेक क्षेत्रांतून विद्यार्थी चमकतात. शाळेतील विद्यार्थ्यांनी तालुका आणि जिल्हास्तरावर यश मिळवले आहे.

शैक्षणिक आणि सहशालेय उपक्रम एकत्र राबवले जातात. केवळ पुस्तकात मर्यादित न ठेवता, प्रयोगशील शिक्षण, कृतीशील शिक्षणावर भर दिला जातो. वर्गात चर्चा, समूह चर्चा, सादरीकरण यामुळे विद्यार्थ्यांचा आत्मविश्वास वाढतो.

या सगळ्या कामगिरीत मुख्याध्यापिका प्रियंका जोशी यांचे नेतृत्व, अनुज ढुमणे यांची नवकल्पकता आणि सुदाम साळुंके यांचा माहिती तंत्रज्ञानाचा वापर या त्रिसूत्रीचा फार मोठा वाटा आहे. शिक्षकांचा संघभाव, सहकार्य, आणि विद्यार्थ्यांना दिलेला वेळ यामुळेच शाळेला ‘गुणवंत घडवणारी शाळा’ ही ओळख मिळाली आहे.

शाळेच्या प्रगतीत पालकांचे आणि शाळा व्यवस्थापन समितीचेही मोठे योगदान आहे. पालक नेहमीच शाळेच्या पाठीशी उभे राहतात. शाळा व्यवस्थापन समिती शिक्षकांना आवश्यक असलेला पाठिंबा आणि सुविधा देण्यासाठी प्रयत्नशील असते.

प्रेरणा म्हणून गटशिक्षणाधिकारी श्रीमती शबाना शेख मॅडम यांचे नाव नेहमी पुढे येते. त्यांच्या सततच्या मार्गदर्शनामुळे आणि प्रेरणेनेच गिरमेवस्ती शाळेने प्रगतीची शिखरे गाठली आहेत.

आजच्या स्पर्धेच्या काळात, केवळ टॉपर विद्यार्थ्यांवर लक्ष केंद्रित करणाऱ्या शाळांमध्ये गिरमेवस्ती शाळा वेगळी ठरते. कारण येथे प्रत्येक मुलाला संधी दिली जाते. सामान्य मुलांमध्येही असलेला सुप्त गुण शोधून त्यांना घडवणे हीच येथे खरी शाळा म्हणून ओळखली जाते.

गिरमेवस्ती शाळेचा हा प्रवास प्रेरणादायी आहे. ग्रामीण भागातही गुणवत्ता, नाविन्य आणि प्रयोगशीलता यांचा संगम साधता येतो, हे या शाळेने सिद्ध केले आहे.